باجوڑ: تعلیمی ادارے کھول دیئے گئے

خار: باجوڑ ایجنسی کے تمام تعلیمی ادارے آج سے کھول دیئے گئے۔ تعلیمی ادارے کھلنے پر عوام نے خوشی کا اظہار کیا ہے۔ اساتذہ اور طلبہ و طالبات کی بڑی تعداد تعلیمی اداروں میں حاضر ہوگئی ہے۔ اس موقع پر طلبہ اور اساتذہ کی حفاظت کے لئے سیکورٹی کے سخت انتظامات کئے گئے ہیں۔ پولیٹیکل انتظامیہ کا کہنا ہے کہ جو اساتذہ تعلیمی اداروں میں حاضر نہ ہوئے ان کے خلاف کارروائی کی جائے گی۔ تحصیل نواگئی اور ماموند میں ڈیڑھ سال سے تعلیمی ادارے بند تھے۔ دیگر علاقوں میں آپریشن کے باعث تین ماہ پہلے اسکول بند کئے گئے تھے۔ سیکورٹی فورسز نے شدت پسندوں کے خلاف کامیاب آپریشن کے بعد ان علاقوں میں اسکول کھولنے کا اعلان کیا۔ باجوڑ ایجنسی میں عسکریت پسند ستر سے زائد اسکول دھماکا خیز مواد سے تباہ کرچکے ہیں۔