رہائشی منصوبہ: امریکا، اسرائیل تعلقات کشیدہ

یروشلم: امریکی نائب صدر کے دورہ اسرائیل کے دوران وزیراعظم نتن یاہو کی جانب سے نئے رہائشی منصوبے کے اعلان پر دونوں ممالک میں تعلقات کشیدہ ہو گئے۔اسرائیلی اخبار ہاریٹز کے مطابق امریکی وزیر خارجہ ہیلری کلنٹن کے بعد صدر براک اوباما نے بھی اسرائیل کو سولہ سو نئے رہائشی مکانات بنانے کے اعلان پر تنقید کا نشانہ بنایا ہے۔ اوباما نے اسرائیلی وزیراعظم کی جانب سے جزوی معافی قبول نہ کرتے ہوئے نتن یاہو کو خبردار کیا ہے کہ اگر وہ امریکا اسرائیل تعلقات کے بارے میں سنجیدہ ہیں تو انہیں اپنے عمل سے یہ بات ظاہر کرنا ہو گی۔ اخبار کے مطابق امریکی انتظامیہ نے اسرائیل کو جاری ہونے والی وارننگ کے اجزاء ظاہر نہیں کئے تاہم اس کے بعد وزیراعظم نتن یاہو کیلئے مشکلات میں اضافے کا امکان پیدا ہو گیا ہے۔