بیت المقدس ،یہودی بستی کی تعمیر پر عالمی تنقید

مقبوضہ بیت المقدس : مقبوضہ بیت المقدس میں نئے رہائشی منصوبے کے اسرائیلی اعلان کو دنیا بھر میں شدید تنقید کا سامنا ہے۔امریکا، اقوام متحدہ، روس اور یورپی یونین نے اسرائیل کی جانب سے نئے سولہ سو مکانوں کی تعمیر کی شدید الفاظ میں مذمت کی ہے۔ مشرق وسطی پر قائم کوارٹیٹ کی جانب سے جاری ہونے والے بیان میں کہا گیا ہے کہ اسرائیل یا فلسطین کی جانب سے کوئی بھی یک طرفہ بیان بین الاقوامی برادری کو قبول نہیں ہو گا۔ انیس مارچ کو ماسکو میں ہونے والی اپنی ملاقات میں امریکا، روس، اقوام متحدہ اور یورپی یونین پر مشتمل کوارٹیٹ صورتحال کا جائزہ لے گا۔ اس سے پہلے ہیلری کلنٹن نے اسرائیلی وزیراعطم نیتن یاہو سے فون پر بات کرتے ہوئے امریکی تحفظات کا اظہار کیا۔ ان کا کہنا تھا کہ اسرائیل کے حالیہ اعلان سے مشرق وسطی میں امن مذاکرات اور امریکا اسرائیل تعلقات پر منفی اثر پڑے گا۔ پینتالیس منٹ سے زیادہ جاری رہنے والی بات چیت میں امریکی وزیر خارجہ نے اسرائیلی رہنما کو ان تمام معاملات سے آگاہ کیا جن پر اسرائیلی اعلان سے منفی اثر پڑنے کے امکانات ہیں۔ہیلری کلنٹن نے کہا کہ جب امریکا مشرق وسطی میں اسرائیل کے تحفظ کی ضمانت لیتا ہے تو اس صورت میں ایسے اعلانات حالات کی بہتری میں مددگار نہیں ہوتے۔