روس بھارت میں سولہ نیوکلیئر ری ایکٹر تعمیر کریگا

نئی دہلی: روس نے بھارت میں سولہ نیوکلیئر ری ایکٹر تعمیر کرنے کا اعلان کردیا۔ روسی وزیراعظم ولادیمر پیوٹن نے کہا ہے کہ عسکریت پسندی کے خلاف اسلام آباد کی کوششوں کو نظر انداز نہیں کیا جاسکتا۔ روس کے وزیر اعظم ولادمیر پیوٹن اسلحہ کی تجارت کے سلسلہ میں بھارت کے دو روزہ دورے پر ہیں۔ روسی ایٹمی ایجنسی کے ترجمان کے مطابق اربوں ڈالرز کے تجارتی معاہدے کے تحت روس بھارت میں سولہ نیوکلیئر ری ایکٹر تعمیر کرے گا۔ چھ نیوکلیئر ری ایکٹر دو ہزار بارہ سے سترہ کے درمیان تعمیر کئے جائیں گے جبکہ مغربی بنگال کے ہری پور اسٹیشن پر کام کا آغاز دو ہزار سترہ کے بعد متوقع ہے۔ دوہزار بارہ تک نیوی ائیرکرافٹ گورشکوف بھارت کے حوالے کیا جائے گا۔ نئی دلی میں ولادمیرپیوٹن نے افغانستان میں غیر ملکی فوج کی موجودگی سے متعلق گفتگو کرتے ہوئے کہا کہ بھارت اور روس کو ہی نہیں بلکہ پورے خطے کو خطرات لاحق ہیں۔ انہوں نے کہا کہ پاکستان نے کالعدم تنظیموں کے خلاف قابل قدرکارروائیاں کی ہیں۔ روسی صدرنے کہا کہ پاکستان نے پاک افغان سرحد پر عسکریت پسندوں کے خلاف فیصلہ کن اقدامات کئے، جو اس بات کا اشارہ ہے کہ اسلام آباد صرف علاقائی نہیں بلکہ عالمی نوعیت کے مسائل میں اہم کردار ادا کرے گا۔