امریکا: افغانستان سےفوجی انخلا کا بل مسترد

واشنگٹن: امریکی ایوان نمائندگان نے افغانستان سے فوج کی فوری واپسی کا بل مسترد کردیا۔ایوان نمائندگان کے ڈیموکریٹک رکن ڈینس کوسی نچ نے افغانستان سے امریکی فوج کی واپسی کا بل پیش کیا جس کی حمایت میں پینسٹھ اور مخالفت میں تین سو چھپن ووٹ ڈالے گئے۔ ایوان نمائندگان میں پہلی بار ایسا ہوا ہے کہ ڈیموکریٹس کی اتنی بھرپور مخالفت کی گئی ہے۔ ایوان نمائندگان میں اس بات پر بحث کی گئی کہ افغان حکومت کے ملکی نظام سنبھالنے کے قابل ہونے تک امریکا وہاں سے نکل سکتا ہے یا نہیں۔ فوجی انخلا کے بل کی مخالفت کرنے والے ارکان کا کہنا تھا کہ جب تک افغان حکومت عوام کو سیکورٹی فراہم کرنے کے قابل نہیں ہوجاتی امریکا وہاں سے نہیں نکل سکتا۔ اگر امریکا قبل از وقت وہاں سے نکل گیا تو طالبان ایک بار پھر افغانستان کو القاعدہ کی محفوظ جنت بنادیں گے۔