انسانی حقوق کی سالانہ رپورٹ جاری

واشنگٹن:  امریکی محکمہ خارجہ نے انسانی حقوق کی سالانہ رپورٹ جاری کر دی ہے۔ رپورٹ کے مطابق فاٹا اور سرحد میں آپریشن کے دوران ایک ہزار سے زائد شہری جاں بحق ہوئے جبکہ شدت پسندوں کی کارروائیوں میں ساڑھے آٹھ سو افراد مارے گئے۔امریکی محکمہ خارجہ کی رپورٹ میں کہا گیا ہے کہ چین، ایران، افغانستان، پاکستان، عراق، مشرق وسطیٰ، افریقہ، یورپ اور ایشیا کے ایک سو چورانوے ممالک میں انسانی حقوق کی خلاف ورزیاں ہو رہی ہے۔ ان ممالک کی حکومتوں کا اس بارے میں ریکارڈ غیر تسلی بخش ہے۔ رپورٹ میں بتایا گیا ہے کہ دو ہزار نو میں پاکستان میں منتخب حکومت نے چند مثبت اقدامات کئے ہیں لیکن انسانی حقوق کی عمومی صورتحال غیر تسلی بخش رہی ہے۔ رپورٹ کے مطابق انسانی حقوق کے بڑے مسائل میں ماورائے عدالت قتل، تشدد اور لاگوں کا لاپتہ ہونا شامل ہے۔ اس کے علاوہ زنا بالجبر، گھروں میں خواتین پر تشدد، جنسی طور پر ہراساں کرنا اور خواتین سے بدسلوکی کے واقعات بھی تشویش کا باعث ہیں۔ اس سال وفاق کے زیر انتظام قبائلی علاقے اور صوبہ سرحد میں جاری فوجی آپریشن کے دوران ایک ہزار سے زائد شہری ہلاک ہوئے جبکہ شدت پسندوں کے حملوں میں آٹھ سو پچاس شہری جاں بحق ہوئے۔ ایک اندازے کے مطابق ملک میں جاری فرقہ وارانہ تشدد میں ایک ہزار ایک سو پچاس افراد ہلاک ہوئے۔ دو ہزار نو میں پاکستان میں پینسٹھ خودکش حملے ہوئے جن میں نو سو ستر افراد جاں بحق ہوئے۔بلوچستان میں جاری کشیدگی میں ایک سو پچیس افراد مار دیئے گئے۔ دو ہزار نو کے آخر تک فاٹا اور صوبہ سرحد میں بارہ لاکھ افراد بے گھر ہوئے۔ مختلف ممالک نے رپورٹ مسترد کرتے ہوئے کہا ہے کہ امریکا کو اپنی جانب سے کی جانے والی انسانی حقوق کی خلاف ورزیوں پر بھی غور کرنا چاہیے۔