دہشتگردی کی سرپرستی کابھارتی الزام مسترد

نئی دلی: پاکستان نے دہشت گردی کی سرپرستی کا بھارتی الزام مسترد کردیا، بھارت میں پاکستانی ہائی کمشنر شاہد ملک نے کہا ہے کہ پچیس فروری کو افغانستان کے راستے پاکستان میں بھارتی مداخلت کا معاملہ بھرپور طریقے سے اٹھایا۔دہلی میں جاری انڈیا ٹوڈے کے زیر اہتمام نویں کانکلیو کے دوران بھارتی وزیر داخلہ چدم برم اور پاکستانی ہائی کمشنر شاہد ملک کے درمیان تلخ جملوں کا تبادلہ ہوا۔ چدم برم نے ایک پھر الزام لگایا کہ پاکستان دہشت گردی کی سرپرستی کر رہا ہے۔ اس موقعے پر موجود پاکستانی ہائی کمشنر شاہد ملک نے چدم برم کے الزام کو سختی سے مسترد کرتے ہوئے کہا کہ بھارت خود افغانستان کے راستے بلوچستان میں مداخلت کر رہا ہے۔ شاہد ملک نے چدم برم کو یاد دلایا کہ پچیس فروری کو پاک بھارت سیکریٹری خارجہ ملاقات میں یہ معاملہ بھر پور انداز میں اٹھایا گیا تھا۔