لشکرطیبہ کا خاتمہ ضروری ہے، ایکرمین

واشنگٹن: امریکی ایوان نمائندگان نے اوباما انتظامیہ پر زور دیا ہے کہ لشکر طیبہ پر مزید توجہ مرکوز کی جائے اور پاکستان پر اسے کنٹرول کرنے کے لئے دباوٴ ڈالا جائے۔ ایوان نمائندگان کی ذیلی کمیٹی برائے مشرق وسطی اور جنوبی ایشیا کے چیئرمین گیری ایکرمین نے کہا کہ لشکر طیبہ جیسے جنونی گروہ کا خاتمہ ضروری ہے۔ انھوں نے کہا کہ لشکر طیبہ انتہائی منظم ، انتہا پسند تنظیم ہے۔ ایوان نمائندگان نے الزام لگایا کہ لشکر طیبہ کے پاکستانی فوج سے روابط بھی ہیں۔ انھوں نے کہا کہ لشکر طیبہ ملک میں بڑے پیمانے پر فلاحی کاموں میں حصہ لیتی ہے اور لاکھوں غریب افراد کی امداد کرتی ہے۔ ایوان نمائندگان کی ذیلی کمیٹی کے ریپبلکن رکن ڈین برٹن کے مطابق لشکر طیبہ کا بڑھتا ہوا اثر ورسوخ خطے اور بین الاقوامی سیکورٹی کیلئے خطرناک ہے۔