جہیز کی واپسی ،ندیم کی بہو کا عدالت سے رابطہ

کراچی :  جہیز کی واپسی کے لیے نامور فلمی اداکار ندیم بیگ کی سابقہ بہو زارا ندیم نے عدالت کا دروازہ کھٹکھٹا دیا ہے۔زارا ندیم نے سپریم کورٹ میں ایک درخواست دائر کی تھی جس میں موقف اختیار کیا گیا تھا کہ وہ اداکار ندیم کے بیٹے فرحان ندیم سے سن دو ہزار پانچ میں رشتہ ازدواج میں منسلک ہوئی تھیں لیکن دونوں کے درمیان ایک سال قبل علیحدگی ہوگئی ہے ۔زارا ندیم کے مطابق انہیں طلاق تو دے دی گئی ہے مگر جہیز کا سامان واپس نہیں کیا گیا ہے، جس کی واپسی کرائی جائے۔ درخواست میں کہا گیا ہے کہ ان کے جہیز کی مالیت ایک کروڑ سترہ لاکھ روپے بنتی ہے جس میں زیوارت اور دیگر سامان کے علاوہ بی ایم ڈبلیو کار بھی شامل ہے ۔ چیف جسٹس افتخار محمد چودھری نے اس درخواست کو آئینی درخواست میں تبدیل کر تے ہوئے اسے سماعت کے لیے جسٹس غلام ربانی کے حوالے کردیا ہے۔ کراچی میں جسٹس غلام ربانی نے گزشتہ روز اس درخواست کی سماعت کی اور اداکار ندیم اور ان کے بیٹے فرحان کو طلب کیا۔جمعے کو ندیم اور فرحان عدالت میں پیش ہوئے۔ عدالت نے انہیں جواب دائر کرنے کا حکم جاری کیا اور اگلی سماعت پچیس مارچ تک ملتوی کردی۔ واضح رہے کہ فرحان ندیم پروڈیوسر ہیں اور آج کل ٹی وی چینلز کے لیے ٹیلی فلمیں بناتے ہیں جبکہ زارا ندیم دبئی کی ایک فضائی کمپنی میں ملازمہ تھیں اور ان کا تعلق بھارت سے ہے۔ سن دو ہزار پانچ میں مذہب تبدیل کرنے کے بعد انہوں نے فرحان ندیم سے شادی کی تھی۔