لاہور: ثقافتی محفل کا انعقاد

لاہور: لاہور میں عوامی اور ثقافتی سرگرمیوں نے دہشت گردوں کے پھیلائے ہوئے خوف کو شکست دے دی، شاہی قلعے کے پہلو میں لوگ صوفیانہ کلام اور منظوم قصے، کہانیاں سنتے سناتے رہے۔تاریخی بادشاہی مسجد کے سامنے یہ ثقافتی محفلیں سالہا سال سے سج رہی ہیں۔ ان میں شرکت کرنے والے شہر کی ثقافت کے امین ہیں، یہ اپنی دھن میں مگن ہیں اور انہیں کسی سیکورٹی کی ضرورت بھی محسوس ہوتی۔ مینار پاکستان، بادشاہی مسجد، شاہی قلعہ کی سیر کو آنے والے یہاں کسی اجازت کے بغیر بیٹھ کر ہیر وارث شاہ، سیف الملوک سن سکتے ہیں اور کچھ سنانا چاہیں تو بھی کوئی پابندی نہیں۔ لوگوں کا دل بہلانے کے لئے یہ عوامی فنکار گلوکاری کے ساتھ ساتھ شعبدہ بازی کا مظاہرہ کرکے بھی داد پاتے ہیں۔ اس ماحول میں لوگ کچھ دیر کے لئے غم دوران کو بھول جاتے ہیں۔یہ بزرگ پیشہ ور نہیں،پنجابی کی منظوم لوک داستانیں انہیں ازبر ہیں، ماضی کے یہ قصے آج کے ملکی اور بین الاقوامی حالات کی بھی درست عکاسی کرتے ہیں۔ یہ بے ساختہ عوامی محفلیں اس بات کا ثبوت ہیں کہ لوگ اپنی ثقافتی روایات طاق نسیاں میں رکھنے پر تیار نہیں، امن کے یہ پیامبر نفرت کے ماحول کو پیار محبت میں رنگ دینے کا گر جانتے ہیں۔