اداکارندیم کی سابق بہو کی انصاف کی اپیل

کراچی: پاکستان کے نامور اداکار ندیم کے بیٹے فرحان بیگ کی سابق بیوی نے چیف جسٹس آف پاکستان سے انصاف کی اپیل کی ہے۔ زارا کے مطابق دوہزار پانچ میں کراچی میں ندیم کے بیٹے فرحان بیگ سے اسکی شادی ہوئی۔ زارا نے آج نیوز سے بات چیت میں اپنی ازدواجی زندگی کے خوشگوار لمحات کا ذکر کیا۔زارا نے بتایا کہ چار سال تک سب کچھ ٹھیک چل رہا تھا لیکن اچانک اسے طلاق بھیج دی گئی۔ زارا نے چیف جسٹس آف پاکستان سے کراچی رجسٹری میں کراچی بار کے صدر محمود الحسن کے ہمراہ ملاقات کی۔ ملاقات کے بعد زارا نے آج نیوز کو بتایا کہ چیف جسٹس افتخار چوہدری نے یقین دلایا ہے کہ اسے انصاف ملے گا۔زارا کا کہنا تھا کہ اسے دھمکیاں دی جارہی ہیں۔ زارا کا معاملہ وزیر اعظم ہاوٴس میں بھی زیر غور ہے۔ فرحان بیگ سے رابطہ کرنے پر آج نیوز کو بتایا گیا کہ زارا سے معاملات طے پاچکے ہیں اور وہ یہ ایشو میڈیا پر نہیں لانا چاہتے جبکہ زارا کا کہنا ہے کہ کوئی معاملہ طے نہیں پایا۔ اگر معاملات طے ہوجاتے تو وہ چیف جسٹس سے انصاف کی اپیل کیوں کرتی۔