حبیب جالب کی سترہویں برسی

لاہور : غربت کی کوکھ سے جنم لینے والے حبیب جالب کی سترہویں برسی آج منائی جارہی ہے ۔حبیب جالب نے نامساعد حالات میں بھی عوام کیلئے آواز اٹھائی اور انکی نمائندگی کا حق ادا کر دیا۔ غربت کی کوکھ سے جنم لینے والے حبیب جالب کی آنکھ نے جو دیکھا اور دل نے جو محسوس کیا اس کو من و عن اشعار میں ڈھال دیا۔ نتائج کی پرواہ کئے بغیر انہوں نے ہر دور کے جابر اور آمر حکمران کے سامنے کلمہ حق بیان کیا۔ حبیب جالب کے بے باک قلم نے ظلم ، زیادتی ، بے انصافی اور عدم مساوات کے حوالے سے جو لکھا وہ زبان زدِ عام ہو گیا صدائے حق کی خاطر اپنی زندگی کا بیشتر حصہ جیل کی سلاخوں کے پیچھے گزارنے والے حبیب جالب کی بیوہ وہیل چیئر پر بیٹھی صدر پاکستان کے ان وعدوں کے ایفا ہونے کی منتظر ہیں جو ایک سال گزر جانے کے باوجود پورے نہیں ہو سکے۔ ان کی بیٹیاں زندگی کی گاڑی کو دھکیلنے کے لئے کیا کیا جتن کرتی ہیں اس سے حکومت کو کوئی سروکار نہیں۔ حبیب جالب نے جہاں اپنی بے باک شاعری سے اردو ادب کو نئی جہتوں سے روشناس کرایا وہیں انہوں نے رومانوی شاعری کو ایک ایسا اسلوب دیا، جس میں جذبوں کی شدت نمایاں ہے ، سترہ سال پہلے آج ہی کے دن عوامی امنگوں کا ترجمان حبیب جالب کلمہ حق کہتے کہتے موت کی اندھی غار میں اتر گیا۔ حبیب جالب کے سرکش قلم نے محکوم اور مجبور انسانوں کو ظلم کے خلاف سینہ سپر ہونے کا حوصلہ دیا ، ان کا ہر شعر مظلوم کے دل کی آواز ہے۔