اسلام آباد: شام موسیقی کا اہتمام

اسلام آباد: اسلام آباد میں لوک رنگوں سے سجی شام موسیقی کا اہتمام کیا گیا۔ پی این سی اے کے ماہانہ پروگرام بیٹھک میں اس بار لوک گلوکاروں کو مدعو کیا گیا، جس میں لوک موسیقی کے دلدادہ بھی کافی تعداد میں شریک ہوئے۔ سرائیکی اور پنجابی کے معروف لوک گلوکار منصور ملنگی نے اپنے مشہور لوک گیت سنا کر سماں باندھ دیا۔ میانوالی کے قربان نیازی نے بابا بھلے شاہ کا تیڈے عشق نچایا کر کے تھیا تھیا خوبصورت انداز میں گا کر شائقین کو ناچنے پر مجبور کر دیا۔ محفل میں ایبٹ آباد کی رافعہ بانو اور خطہ پوٹھوار کے فرزند اور معروف لوک گلوکار عطاء اللہ عیسیٰ خیلوی کے شاگرد حکمت اعوان نے بھی اپنی آواز کے جوہر دکھائے۔ موجودہ حالات میں جہاں ثقافتی سرگرمیاں بتدریج کم ہو رہی ہیں وہاں پی این سی اے کی جانب سے لوک موسیقی کے فروغ کیلئے ایسی محفلوں کا انعقاد یقینا خوش آئند ہے جسے جاری رہنا چاہیے۔