لاہور: رقص و موسیقی کا اہتمام

لاہور: اندرون دہلی گیٹ لاہور میں واقعہ مغلیہ دور کے شاہی حمام میں رقص و موسیقی کی شام کا اہتمام کیا گیا۔رقص اور موسیقی کی اس منفرد شام کا اہتمام جرمنی ، پاکستان اور کانگو کی مشترکہ ثقافتی تنظیم نے کیا تھا۔اس موقعے پر دہلی گیٹ میں واقع شاہی حمام کے اندرونی ماحول کو مغلیہ دور کے مطابق ڈھالا گیا تھا۔ بینا جواد ڈانس گروپ کے فنکاروں نے حمام کے اندرونی حصہ میں دیئوں اور فانوس کی روشنی میں پرفارم کیا، جو ایک دلچسپ تجربہ تھا۔ اس پروگرام کو جرمنی کی اسٹیفنی اوبرہوم نے آرگنائز کیا تھا۔ اس موقعے پر جواں سال کتھک ڈانسر عمیر عارف کی زبردست پرفارمنس نے سماں باندھ دیا۔ انہوں نے مور رقص کا مظاہرہ کیا۔ آخر میں فنکاروں نے شاہی حمام کی چھت پر مکرانی رقص کا مظاہرہ کیا، جس کو حاضرین نے انجوائے کیا۔ کانگو کے فنکار جین پئیر کانکو نے بھی اپنی فن کا مظاہرہ کیا۔اپنی نوعیت کی اس منفرد پرفارمنس کو دیکھنے کے لئے حاضرین کی بڑی تعداد شاہی حمام دہلی گیٹ میں موجود تھی۔ تین ممالک کے فنکاروں کی اس مشترکہ کاوش کو شائقین نے بہت پسند کیا۔