عالمی بینک نے سیلاب کیلئے مختص رقم ایک ارب ڈالر کر دی

واشنگٹن: عالمی بینک نے پاکستان کے سیلاب زدہ علاقوں کی بحالی کے لیے مختص کی گئی رقم دس کروڑ ڈالر سے بڑھا کر ایک ارب ڈالر کر دی ہے۔ اس قرض پر عالمی بینک سود وصول نہیں کریگا۔ اس بات کا اعلان عالمی بینک کے صدر نے واشنگٹن میں پاکستان کے وزیر خزانہ حفیظ شیخ سے ملاقات کے بعد کیا۔ عالمی بینک کے صدر کے مطابق بینک مصیبت کی اس گھڑی میں پاکستان کو تنہا نہیں چھوڑے گا۔ حکومت پاکستان اس رقم کو سیلاب زدہ علاقوں کی بحالی کے لیے قلیل اور طویل مدتی ضرویات کیلیے استعمال کر سکے گی۔ عالمی بینک یہ رقم غریب ترین ملکوں کیلئے قائم فنڈ انٹرنیشنل ڈیویلپمنٹ ایسوسی ایشن سے جاری کریگا جس پر کسی طرح کا منافع لاگو نہیں ہوتا۔ بینک کا صدر نے مزید کہا ہے کہ سیلاب زرگان کی بحالی کے کاموں کے دوران ملک میں اہم معاشی اصلاحات بھی جاری رہنی چاہیں۔