حکمران معاشی ترقی میں سنجیدہ نہیں، اشفاق

کراچی: سابق مشیرخزانہ ڈاکٹر اشفاق حسن خان نے کہا ہے کہ حکومت نے نہ صرف فرینڈز آف پاکستان کورقم فراہم کرنے کا فورم سمجھا بلکہ بجٹ فائنانسنگ کے لئے بھی اسی پرانحصار کیا، جو سنگین غلطی ہے۔ ڈاکٹر اشفاق حسن نے آج نیوز کے پروگرام آج مارکیٹس میں گفتگو کرتے ہوئے کہا کہ موجودہ حکومت معاشی ترقی کے بجائے صرف سیاست پر زور دے رہی ہے۔ اگر حکمراں معاشی ترقی کے لئے سنجیدہ ہوتے تو آج ملک ترقی کی دوڑ میں آگے ہوتا۔ پاکستان میں ہر شعبے میں سیاسی مداخلت جاری ہے، پارلیمنٹ صرف خرچ کرنا جانتی ہے، وسائل پیدا کرنا نہیں، غیرمنتخب مشیر اخراجات کم کرنے کی بات کرتا ہے لیکن سیاستدانوں پر مشتمل پارلیمنٹ اس پر تیار نہیں ہوتی، ایسی صورتحال میں اداروں میں ٹکراوٴ ہوتا ہے۔ ان کا کہنا تھا کہ ایٹمی قوت پاکستان کو بدقسمتی سے وزارت خزانہ کے لئے ایک مشیر بھی دستیاب نہیں، تاخیر کی وجہ سے عالمی سطح پر پاکستان کی بڑی رسوائی ہو رہی ہے۔ ایک سوال کے جواب میں ڈاکٹر اشفاق حسن نے کہا کہ حکومت کا پبلک سیکٹر ڈیولپمنٹ پروگرام میں اضافے کا فیصلہ سراسر غلط تھا۔