ویلیو ایڈڈ ٹیکس : آئی ایم ایف کو ضمانت نہیں دی، ایف بی آر

اسلام آباد: فیڈرل بورڈ آف ریونیو کے چیئرمین سہیل احمد خان نے کہا ہے کہ صوبوں اور وفاق کے اتفاق کے بغیر ویلیو ایڈڈ ٹیکس نافذ نہیں کیا جائے گا۔ فیڈریشن آف پاکستان چیمبر آف کامرس اینڈ انڈسٹریز میں صنعتکاروں سے خطاب مین چیئرمین ایف بی آر نے کہا کہ ویلیو ایڈڈ ٹیکس کے نفاذ کے لئے عالمی مالیاتی فنڈ کو کوئی ضمانت نہیں دی گئی اور یہ ٹیکس چاروں صوبوں اور وفاق کے باہمی اتفاق کے بعد عائد کیا جائے گا۔ ان کا کہنا تھا کہ گیہوں اور آٹے کو ویلیو ایڈڈ ٹیکس سے مستثنیٰ رکھا جائے گا، جان بچانے والی ادویات کو حکومت چھوٹ دے سکتی ہے۔ اس موقعے پر فیڈریشن کے صدر سلطان احمد چاؤلہ نے کہا کہ ویلیو ایڈڈ ٹیکس قوانین کی یقین دہانی پر اعتبار نہیں کیا جاسکتا کیونکہ حکومت کی جانب سے جو وعدے کئے جاتے ہیں وہ پورے نہیں ہوتے۔ ان کا کہنا تھا کہ بجلی اور پیٹرولیم مصنوعات کی قیمتوں میں جس شرح سے اضافہ کیا جارہا ہے، اس کے سنگین نتائج بھگتنا ہوں گے۔