تجارتی مراکز رات آٹھ بجے بندکرنیکافیصلہ مسترد

کراچی: کراچی ٹریڈرز ایکشن کمیٹی نے رات آٹھ بجے تجارتی مراکز بند کرنے کے حکومتی فیصلے کو مسترد کر دیا اور کہا ہے کہ اگر دکانیں زبردستی بند کرانے کی کوشش کی گئی توغیر معینہ تالہ بندی کی جائے گی۔کراچی ٹریڈرز ایکشن کمیٹی کے چیئرمین صدیق میمن نے آج نیوز سے گفتگو کرتے ہوئے بتایا کہ گزشتہ روزآل کراچی تاجر کنونشن منعقد ہوا جس میں کراچی کی دو سو سے زائد مارکیٹوں کے نمائندوں نے شرکت کی۔تاجر نمائندوں نے متفقہ طور پر رات آٹھ بجے مارکیٹیں بند کرنے کے حکومتی اعلان کو مسترد کر دیا۔ حکومت نے پندرہ مارچ سے کراچی میں مارکیٹیں اور بازار رات آٹھ بجے بند کرنے کا حکم دیا تھا۔ صدیق میمن نے اس فیصلے کو کراچی کا کاروبار تباہ کرنے کی سازش قرار دیتے ہوئے خبردار کیا کہ دکانیں زبردستی بند کرانے کی کوشش کی گئی تو مارکیٹوں پر غیر معینہ مدت کے لئے تالے ڈال دیئے جائیں گے۔ انہوں نے کہا کہ تمام مارکیٹیں اوربازار حسب سابق صبح گیارہ بجے کھلیں گی اوررات دس بجے بند کی جائیں گی۔