منگلاڈیم: پانی کی سطح ڈیڈ لیول پربرقرار

میر پور: منگلا ڈیم میں پانی کی سطح گزشتہ چھ روز سے ڈیڈ لیول ایک ہزار چالیس فٹ پر برقرار ہے۔ محکمہ موسمیات کا کہنا ہے کہ آئندہ دو ہفتے تک آبی ذخائر کی صورتحال میں بہتری کا امکان نہیں۔ محکمہ موسمیات کے اعداد و شمار کے مطابق ملک کے بالائی علاقوں میں گزشتہ ایک ہفتے سے موسم خشک ہے جس کے باعث آبی ذخائر میں پانی کی آمد میں کمی ہوگئی ہے۔ منگلا ڈیم میں پانی کی سطح ڈیڈلیول ایک ہزار چالیس فٹ تک پہنچ گئی ہے۔ منگلا ڈیم میں پانی کی آمد بیس ہزار پانچ سو چوراسی اور اخراج اکیس ہزار چھ سو چونتیس کیوسک ہے۔ تربیلا ڈیم میں بھی پانی کی سطح ایک ہزار تین سو اسی فٹ ہے۔ ڈیم میں پانی کی آمد بائیس ہزار دو سو کیوسک اور اخراج پینتیس ہزار کیوسک ہے۔ محکمہ موسمیات کا کہنا ہے کہ آئندہ ایک ہفتے تک ملک کے بالائی علاقوں میں بارش کا امکان نہیں جس کے باعث ڈیموں میں پانی کی صورتحال مزید خراب ہوجائے گی۔ محکمہ موسمیات کے مطابق اپریل میں درجہ حرارت میں اضافہ کے باعث گلیشیئرز پگھلنے سے آبی ذخائر میں پانی کی آمد میں اضافہ متوقع ہے۔