اپٹما کے مطالبات پر غور کیا جارہا ہے، امین

لاہور: وفاقی وزیر تجارت مخدوم امین فہیم نے کہا ہے کہ پیپلز پارٹی کے روٹی،کپڑا اور مکان کے نعرے کی راہ میں دہشت گردی اور مالی مسائل رکاوٹ بن گئے ہیں۔وہ لاہور میں ایکسپو سنٹر کے دورے کے بعد میڈیا سے بات چیت کر رہے تھے۔ مخدوم امین فہیم نے کہا کہ بم دھماکوں کے باعث بیرونی سرمایہ کاری بری طرح متاثر ہو رہی ہے لیکن خود کش حملوں کو روکنا کسی کے بس میں نہیں۔ وزیر تجارت کا کہنا تھا کہ آل پاکستان ٹیکسٹائل ملز ایسوسی ایشن کی طرف سے اٹھارہ مارچ کو ہڑتال کی کال پر ان کے جائز مطالبات تسلیم کرنے پر غور کیا جارہا ہے۔ انہوں نے کہا کہ پیپلز پارٹی عوامی مسائل کے حل کے لئے کوشش کرتی رہے گی۔وفاقی وزیر تجارت نے کہا کہ دہشت گردی کے باوجود سال رواں میں برآمدی اہداف حاصل کرنے کی کوشش کی جائے گی۔ انہوں نے کہا کہ امریکا سے مارکیٹ تک آسان رسائی کی بات کی جا رہی ہے لیکن پہلے وہ اپنی صنعت کو تحفظ دیتے ہیں اور پھر ہماری بات سنتے ہیں۔