عوام کیلئے گیس کے بل ادا کرنا ممکن نہیں، نثار

اسلام آباد: پبلک اکاونٹس کمیٹی نے گیس صارفین کے لئے مقررہ سلیب سسٹم پر نظرثانی کی ہدایت کرتے ہوئے وزارت پٹرولیم سے پندرہ دن میں رپورٹ طلب کر لی، چوہدری نثار کا کہنا ہے کہ مشکلات میں گھرے عوام کے لئے گیس کے بل ادا کرنا ممکن نہیں۔اسلام آباد میں چوہدری نثار علی خان کی زیر صدارت پی اے سی کے اجلاس میں اراکین نے گیس صارفین کیلئے رکھی گئی کم سے کم حد پر شدید تحفظات کا اظہار کیا اور کہا کہ اس حد میں چند گھنٹوں کیلئے ایک چولہا ہی جل سکتا ہے۔ کمیٹی نے مقرر کردہ سلیب پر سیکرٹری پٹرولیم سے پندرہ دن میں رپورٹ طلب کر لی۔ چوہدری نثار نے کہا کہ ریگولیٹری اتھارٹیز حکومت کا حصہ بن گئی ہیں اور صارفین کا خیال نہیں رکھاجاتا۔ کمیٹی نے رہائشی علاقوں میں قائم سی این جی اسٹیشنز کے بارے میں تفصیلات طلب کرتے ہوئے ان کی آواز سے لوگوں کو درپیش مشکلات کا جائزہ لینے اور پالیسی بنانے کی ہدایت کی ہے۔ کمیٹی کو بتایا گیا کہ سی این جی اسٹیشنوں کے لئے اجازت وزارت صنعت کے محکمہ ایکسپلوسیو سے لی جاتی ہے جو بغیر تصدیق کئے لائسنس جاری کرتے ہیں۔ کمیٹی نے گزشتہ دس سال میں محکمہ ایکسپلوسیو کے سربراہ رہنے والے افسران کو اجلاس میں طلب کرنے کا فیصلہ کر لیا۔ کمیٹی نے ایل پی جی کی پیداواری لاگت کو مدنظر رکھ کر قیمت متعین کرنے کی بھی ہدایت کی۔