تھرکول پروجیکٹ: ڈھائی ارب ڈالر قرضہ لیا جائیگا، اسد

کراچی:  تھرکول انرجی بورڈ کے رکن اسد علی شاہ نے کہا ہے کہ رواں سال جون تک تھر کول پروجیکٹ کی فزیبلٹی رپورٹ مکمل کر لی جائے گی، منصوبے کیلئے ڈھائی ارب ڈالر بینکوں سے قرضہ لیا جائے گا۔ کراچی میں انسٹی ٹیوٹ چاٹرٹرڈ اکاوٴنٹینٹ آف پاکستان کی جانب سے سی ایف او کانفرنس منعقد کی گئی۔ کانفرنس کے بعد آج نیوز سے گفتگو کرتے ہوئے ممبر تھر کول انرجی بورڈ سید اسد علی شاہ نے کہا کہ تھر کول منصوبے پر تیزی سے کام جاری ہے۔ انہوں نے بتایا کہ جون تک تھر کول پروجیکٹ کی فزیبلٹی رپورٹ مکمل کرلی جائے گی۔ ان کا کہنا تھا کہ پروجیکٹ کیلئے ڈھائی ارب ڈالر کی بینک فنانسنگ حاصل کی جائے گی۔ انہوں نے کہا کہ تھر کول پروجیکٹ کے ذریعے پانچ ہزار میگاواٹ بجلی پیدا ہوگی اور اس کے لئے حکومت سندھ کا اینگرو کے ساتھ معاہدہ ہوا ہے جس کے تحت اینگرو اور پیپکو ایک ایک ہزار میگاواٹ بجلی پیدا کریں گے۔