پاکستان کا ٹریڈپرو فائل تبدیل ہورہا ہے، محب اللہ

کراچی: چیئرمین ٹریڈ ڈیولپمنٹ اتھارٹی پاکستان نے کہا ہے کہ پاکستان کا ٹریڈ پروفائل تبدیل ہو رہا ہے،امریکا اور یورپ کے بجائے ایشیائی ممالک سب سے بڑی منڈی ہیں۔ٹی ڈی اے پی کے سی ای او سید محب اللہ شاہ نے کورنگی ایسوسی ایشن آف ٹریڈ آف انڈسٹریز میں ممبرز سے خطاب میں کہا کہ ایکسپو دو ہزار دس میں پچاس فیصد سے زائد آرڈرز ایشیائی ممالک سے ملے ہیں جس کا مطلب ہے کہ پاکستان کا ٹریڈ پروفائل تبدیل ہو رہا ہے جو بہت اہمیت کا حامل ہے۔ انہوں نے کہا کہ وسط ایشیائی ممالک کو فضائی کے علاوہ زمینی راستے سے بھی مواصلاتی سہولت فراہم کی جائے گی۔ کاٹی کے چیئرمین رزاق پراچا نے کہا کہ برآمدکنندگان ملائیشیا کے لئے تجارتی وفد اور دیگر مسائل کے حل کے لئے ٹی ڈی اے پی کا تعاون چاہتے ہیں۔ محب اللہ شاہ نے یقین دلایا کہ ملائیشیا کے لئے تجارتی وفد ٹی ڈی اے پی اسپانسر کرے گا۔ ان کا کہنا تھا کہ وسط ایشیائی ممالک کے لئے بھی تجارتی وفود بھیجے جائیں،اس سلسلے میں ٹی ڈی اے پی تعاون کرے گی۔