قرضے کے حصول میں رکاوٹ نہیں ہوگی، ترین

اسلام آباد: سابق وزیر خزانہ شوکت ترین کا کہنا ہے کہ نئے وزیر خزانہ کی تقرری میں تاخیر سے آئی ایم ایف سے پانچویں قسط ملنے میں کوئی رکاوٹ نہیں ہو گی۔پاکستان کو گیارہ ارب تیس کروڑ ڈالر قرضے کی پانچویں قسط کے اجرا کی منظوری دینے کے لئے ائی ایم ایف کے بورڈ کا اجلاس چوبیس مارچ کو ہو رہا ہے۔ بعض حلقوں کا کہنا ہے کہ نئے وزیر خزانہ کی تقرری میں تاخیر سے پانچویں قسط کی منظوری بھی موخر ہو سکتی ہے۔ شوکت ترین نے رائٹرسے گفتگو کرتے ہوئے کہا کہ قسط کے سلسلے میں تمام ٹیکنیکل مسائل فروری میں ہی طے ہو گئے تھے اب صرف بورڈ کے اجلاس میں اس تجویز کو سرکولیٹ کرنا باقی ہے اور میرے خیال میں اس میں کوئی رکاوٹ نہیں ہونی چاہئے۔ وزیر اعظم کے سابق مشیر خزانہ سلمان شاہ کا بھی کہنا ہے کہ نئے وزیر خزانہ کی تقرری کی وجہ سے قسط میں تاخیر نہیں ہونا چاہئے۔ انہوں نے کہا کہ اگر آئی ایم ایف کو یقین دہانی کر دی جائے کہ پالیسی میں اچانک کوئی تبدیلی نہیں ہو گی تو کوئی بڑا مسئلہ نہیں پیداہو گا،دستاویزات پر وزیر اعظم دستخط کر سکتے ہیں۔ ادھر حکومت کے ترجمان نے کہا ہے کہ نئے وزیر خزانہ کے نام پر صدر اور وزیر اعظم میں کوئی اختلاف نہیں ہے کئی امیدواروں کے ناموں پر غور کیا جا رہا ہے اور فیصلہ ہونے پر اعلان کر دیا جائے گا۔