بدین: ٹماٹر منڈی تباہی کے دہانے پر

بدین: بدین میں قائم ایشیاء کی سب سے بڑی ٹماٹر منڈی سندھ حکومت کی غلط پالیسیوں کے باعث تباہی کے دہانے پہنچ گئی۔ بھارت سے ٹماٹر کی درآمد نے سندھ کے کاشتکاروں کو کنگال کردیا۔ بدین کی منڈی سے روزانہ دو سو ٹرک ٹماٹر ملک بھر میں روانہ کیے جاتے ہیں۔ یہ ملک کی واحد منڈی ہے جہاں ہر سال اکتوبر سے فروری تک ٹماٹر کا سیزن چلتا ہے اور سرحد، بلوچستان کے سیکڑوں مزدور روزگار کے لئے بدین کا رخ کرتے ہیں۔ لیکن اب حکومت نے بھارت سے ٹماٹر کی درآمد کی اجازت دیکر منڈی کو تباہی کے دہانے پہنچا دیا ہے۔ پنجاب کے تاجر واہگہ بارڈر سے آنے والے ٹماٹر خرید رہے ہیں۔ جس کی وجہ سے بدین سے ملک بھر میں ٹماٹرکی ترسیل نہ ہونے کے برابر ہے اور مقامی کاشتکار بہترین فصل ہونے کے باوجود خالی ہاتھ بیٹھے ہیں۔ ٹماٹر کی سپلائی بند ہونے سے مقامی مارکیٹ میں قیمت تین روپے فی کلو گرام ہو گئی ہے۔ کاشتکاروں کا کہنا ہے کہ قیمت کم ہونے سے فصل پر آنے والی لاگت بھی پوری نہیں ہو پارہی۔ جس سے انہیں کروڑوں روپے کے نقصان کا سامنا ہے۔ انہوں نے احتجاج کرتے ہوئے حکومت سے مطالبہ کیا ہے کہ ٹماٹر کی بھارت سے درآمد پر پابندی لگائی جائے۔