پی ایس او کے ڈیفالٹ ہونے کا خدشہ

اسلام آباد: بیس اپریل تک ستاون ارب روپے نہ ملنے کی صورت میں پاکستان اسٹیٹ آئل کے ڈیفالٹ ہونے کا خدشہ ہے۔ قائمہ کمیٹی نے پی ایس او کو سرکلر ڈیٹ کے حوالے سے خط بھیجنے کی ہدایت کر دی۔ قومی اسمبلی کی قائمہ کمیٹی برائے پیٹرولیم کا اجلاس چیئرمین شیخ وقاص اکرم کی صدارت میں ہوا۔ ایم ڈی پی ایس او نے بریفنگ دیتے ہوئے بتایا کہ حکومت نے پی ایس او کو ایک سو پانچ ارب روپے دینے تھے لیکن وزارت خزانہ نے صرف پانچ ارب روپے دیئے ہیں، اگر بیس اپریل تک ستاون ارب روپے نہ ملے تو پی ایس او ڈیفالٹ کر جائے گا۔ جس پر کمیٹی نے پی ایس او کو سرکلر ڈیٹ کے حوالے سے خط بھیجنے کی ہدایت کی جو کمیٹی وزیراعظم کو بھجوائے گی۔ سیکرٹری پیٹرولیم کامران لاشاری نے کہا کہ پاکستان میں ٹیکس وصولیوں کا دائرہ محدود ہے، اس لیے محصولات کا زیادہ تر حصہ پیٹرولیم مصنوعات پر ٹیکسوں کے ذریعے حاصل کیا جاتا ہے۔ حکومت پیٹرولیم مصنوعات پر تقریبا تیس فیصد ٹیکس وصول کر رہی ہے۔ انٹرسیڈ گیس کمپنی کے ایم ڈی نعیم شرافت نے کمیٹی کو بتایا کہ ایران پاکستان بھارت گیس پائپ لائن منصوبے کے ہیڈز آف ایگریمنٹ پر سولہ مارچ کو دستخط ہوں گے۔